تجهيزاتي ليوم عرسي + اساسيات تجهيز العروس + نصايح لكل عروس تجهز ..My wedding Day ♥︎

 لسلام عليكم ورحمه الله ..

بما انج دخلتي هالبوست معناته نقدر نقولج مبروك ...والله يتمم عليج ويوفقج يارب ويهنيج بالحياه اليديده ..

اول شي سوي لج قهوه وهاتي نوته وقلم وتعالي قعدي معاي ... 

...

بالبدايه موضوع التجهيز يحتاج بال طويل جدا مو انه شي صعب لا بالعكس ممتع بس عشان تكون اختياراتج صح .. وما تقطين فلوسج على شغلات مو محتاجتها .. 

الموضوع راح ينقسم لـ:

- تجهيز يوم عرسي

- اساسيات جهاز العروس

النقطه الاولى المهمه واهي اساس كل شي :

 تاريخ العرس .. لما يتحدد تقدرين ترتبين امورج كلها .. سواء انتي مسويه العرس او اهل الزوج .. بالنسبه لي بين عرسي وملجتي 4 شهور وكانت فتره جدا كافيه .. اذا طالت المده اكثر من 5 شهور يصير الموضوع مملل وو تقعدين تدققين على كل شي ( هذي وجهة نظري الشخصيه ) 

حددتي التاريخ المناسب  عندج 7 خطوات مهمه تسوينها وترتاحين من هم التفكير :

1- تروحين تحجزين الصاله والبوفيه وتدفعين عربون 

2- تحجزين مصمم العرس ( الي بيصمم العرس من الى )

3- تحجزين المصوره

4- تحجزين الدي جي او المطرب

5- تختارين الاتيليه الي تبين منه بدلة عرسج اذا تبين مصمم

6- تحجزين الميكب والشعر 

7- اختيار مطرب الزفه

الحين بعد هالخطوات بقولكم عن تفاصيل عرسي : 

ملاحظة بنزلكم صوره بالانستا فيها تاق لكل الحسابات عشان الوصول يكون اسرع .

حجزت بصاله فندق موفنبيك لاني ابي صاله كبيره  لان ضيوفنا وايد 

 ومصمم العرس اسمه ( احمد البكر ) (شركة فيلا جاليريا - حولي - مجمع سنام )

شفت شغله بالانستا وحيييل عجبني مع ان ماشفت شغله عالطبيعه :)  

وحطينا موعد الاول ورحنا وقعدنا معاه وكلمناه شنو نبي وشنو مانبي واتفقنا على كل شي يناسب الميزانيه  للامانه ريحني وماشلت هم شي يخص العرس دفعت العربون  وحددت موعد ثاني بعد فتره عشان اختار تصميم الكوشه واتفقت على كل التفاصيل معاه ..

وقبل العرس بفتره رحت كملت باقي المبلغ .. و طول الفتره انتواصل معاه عشان الاضافات وكل شي  .. 

الشغلات الاساسيه بالعرس ( الكوشه ، البنشات ، الحلاو ع الطاولات ، السجاد والبنر والستيج ، الهاند بوكيه للعروس ، مدخل العروس ، ديكور اسامي العائلات ، المفتشات للموبايلات  طاوله الحلو + طاوله العطور+ حلو القهوه )  

كلمة حق بالمصمم صج صج كان التعامل معاه جدا راقي ومريح وباله طويل وحطلي اشياء بالعرس ماتوقعتها بتكون بهالجمال .. اشكرره على ابداعه بليلة عمري ..الشكر مايوفيه ..

بالنسبه للمصوره كنت محتاره بين مصورتين واخر شي استقريت على هبه الجدعان

 ( هبه فوتو- برج التجاريه ) وعندها اكثر من باكج اخترت البكج المناسب لي والباكج الي اهي تطلع فيه لان كنت ابيها تكون موجوده   .. استمتعت جدا واهيا تصورني مع ستافها اللقطات شي عجيب ماشاء الله وكافي نفسيتها العسل  وستافها يهبلون الفلبينيات حيل شاطرين وخصوصا ميتس بدعت فيني هههههه ياحلوها ..

الدي جي اخترنا دي جي الليلك ( مجمع البستان - السالميه) مع الاخ احمد بددددددددددع بالعرس محد قعد بمكانه صج صج شال العرس شال شيل ونفسيته حلوه وتعامله مريح ..

خدمة التعطير والتبخير من عطورات ساسورا ..

 شي جديد ومختلف عن المعتاد وعطورهم وخلطاتهم احبها تشوفوني بسناب دايما امدحهم ..اختياري كان موفق .. الحمدلله

بالنسبه للزفه انا اخترت الفنان : طارق الخريف كانت امنيتي يغني زفتي والحمدلله تحققت سويتها عند جاسم الرندي كلمه لي ودفعت فلوس الزفه والاغنيه الخاصه عنده

(( يفضل قبل العرس بشهرين 3 تدفعين وتسوين لان زحمه عنده ماشاءالله ))  وقبل عرسي بفتره اتصل الفنان علي عشان ياخذ الاسامي والطلبات الي ابيها وكانت نفسيته حلوووه 

زفتي كانت ( هب السعد + بدر التمامي السريعه بعد هب السعد ) ماكو على هب السعد صج صج زفة عروس ..

الميكب حجزت عند (م .عبير علي) شايفه شغلها اكثر من مره ..

 حطت لي انا وامي واختي ... طلعتنا بشكل غييير وخصوصا انا ماعرفت نفسي صج صج حبيت مكياجي وكان مثل ما ابي ...

قلت لها شنو احب وشنو ماحب وغمضت مافتحت عيني الا لما خلصت سلمت نفسي لها وصج صج عجبني ماشاء الله

بالنسبه للشعر سوينا عند (حنان اليجنت ليدي -الشعب ) حجزتها ودفعت عربون وطلعت لي الفندق ..احب شغلها صج تبدع بشعري دايما وايدها خفيفه ماشاء الله

اخيرا وليس اخر البدله كانت تصميم خاص لبسه اولى من اتيليه ( منال المياس -البدع  ) صممها لي المصمم مصطفى (تركي)  شرحت له الستايل الي احبه وخذو القياسات وسوالي تصميم يناسبني وصج طلعني ملكه ... ( بمدح روحي ههههههه عادي ) وخذيت منهم الرداء واكسسوار الشعر وفلبينيات 2 وشكولي الشوز مالي بنفس شك البدله ..

الحمدلله كان كل شي مثل ما ابي  .. 

بالنسبه لحلو القهوه  عندي كان 10 مواعين من 3 محلات ( لاريف + جوكلت اند مور + او ار ) الحمدلله كانت اختيارات موفقه وعجبت الكل

سوفنيرز العرس كان هديه من اهلي من محل   the chocolate ave : كاكاو باسمي واسم زوجي مزين بورد الجبسوفيليا الوردي .. شكله مرتب وانيق . :*

 عطوري بعرسي :

عطر الشعر والجسم شانيل  كوكو مادموزيل

عطر العرس شانيل كرومانديل

شيلاء من دار الطيب

مثبت البخور من مركز صابر بالغوالي تحت

بخور عرسي من اطياب الشيخ هندي سوبر

مسك من اجمل انترنال - باريس غاليري -دبي مول

هردة العنقا - من اطياب المرشود

تجهيز العروس  :

اول شي مهرج لازم تقسمينه تاخذين اظرف 

ولكل ظرف شي مخصص :

- ظرف فيه مبلغ  لنفنوف العرس

- ظرف فيه مبلغ  للميكب والشعر

- ظرف فيه مبلغ للمصوره 

-ظرف فيه مبلغ للشبكه والساعه

-ظرف فيه مبلغ لذهب + ساعه العرس

-  ظرف للعنايه (ليزر \جلديه الــخ )

بعد ماتحددين هالاشياء المهمه .

باقي المبلغ .. تجهيز الملابس :

اول شي سوي تصفيه لكبتج وشوفي البدل والاشياء الزينه والحجابات الي ما كرفتيها حيل او  غاليه استفيدي منها والي استهلكتيه تبرعي فيه .. ترى مو معناته انج عروس يعني كل شي يديد تشترينه من الى .. :( يمكن في اشياء زينه ماشافوها حمولتج :) .. 

نبدي باللسته من غير تحديد عدد القطع ليش لان اذا كثرتي يمكن ماتلبسينهم كلهم وتحملين او ماتناسب ذوق زوجج او تروح موضتها .. يالله بسمالله :

الملابس :

- ملابس طلعه

- بدل استقبالات

-بدل سهره 

-عبي عمليه \كشخه

-دراريع ناعمه ( اذا ساكنه عند حموله )

- بجامات حرير \قطن

- قمصان خاصه .. 

- ملابس للبيت تيشيرتات نفانيف قصيره 

- ملابس داخليه كشخه \عمليه

- بديات طويله \قصيره \حفر او جم طويل

- حجابات قطن \شيفون

-طقم ارواب وفوط  لج ولزوجج

- روب حريرbride ليوم العرس

(( الارواب والفوط وروب الحرير ليوم العرس خذيتهم من @lulugits الشغل ولا غلطه تبارك الرحمن والخامه حلوووه ))

- عبايات عمليه 

- عبايات شك وكشخه للمناسابت ( انا خذي من دار العنقا عبايه شك تعقددددد من جمالها ) وايد حلو الشغل ونظيف

الاحذيه ومستلزماتهم :

جم كعب الوان اساسيه وجم قطعه مميزه 

سلبرز حق البيت وسلبرز يلوق مع البجامات 

سلبرز للحمام وشغل البيت

دلاقات شفافه

دلاقات للبيت 

جيجي اسود وبيج للبدل القصيره

الاكسسوارات :

-شباصات \باندات\ ربطات شعر 

- اكسسوارات - ماركه او عاديه 

- جم جنطه ماركه  ( اذا ميزانيتج تسمح )

(( الوان اساسيه تستهلكينها دايما مثل الاسود \الفضي\ الذهبي))

العطورات :

- عطور فرنسيه

-عطور عربيه

-بخور يومي \مناسبات \معمول

- عطور للبجامات ( تكون ريحتها خفيفه وبارده ومو ثقيله ، عطورات فكتوريا سيكرت حلوه وخفيفه )

- مسك ( اجمل احبه )\دهن عود ( اذا تحبينه انا شخصيا ماتقبل ريحته)  \ هردة العنقا من المرشود (( من مفضلاتي ))

-خلطات ومرشات لشقتج ( بلانك من القريشي ، مرشات مستر مبخر ** تعطيره ، عود ، خنه اكثر شي حبيته منهم )

مستلزمات النظافة :

- شاور جيل 

( اخذي لج طقم كامل من شاور جيل ولوشن وسبراي بس واحد عشان ما تملين وتكرهينه انا خذيت طقم وشريت شاور جيل اكثر من نوع بس الشاور جيل من باث اند بدي )

- شامبو وبلسم 

-غسول رغوة الايدين من باث اند بدي من ضروريات الحياة عندي

- معجون اسنان وفرشه جديده 

-غسول الوجه

- مناديل مكياج

- قطن ( قطن موجي حلو وناعم واقتصادي + مال بوتس حلو بعد )

-اعواد اذان 

- مزيل مكياج الوجه والعين (احب بايودرما  للوجه - سيفورا للعين  )

- غسول للمنطقه الحساسه

- سنفرة شفايف من لش 

- سنفرة الوجه

- سنفرة الجسم

-مرطب الوجه

-مرطب الجسم

- تونر

-ماسكات مختلفه ( عنايه واهتمام ضروريه ماتهملين بعد العرس )

- ديودرنت 

الاشياء الاستهلاكيه اخذي منها كميه 3-4 عشان تفتكين اول فتره ماتروحين السوق  مثل :

(الديودرنت ، الشامبو ، القطن ، مناديل الميكب ، كريم الوجه الـخ)

الحين لـ البارت الي يحاتونه البنات الميكب !! 

اول شي مثل ماسوينا تصفية لكبتج نسوي تصفيه لدرج الميكب ونشوف الاشياء الزينه والي ما خربت  ونحدد النواقص .. بكتبلكم لسته لاهم الاشياء لاتكثرووووون احنا البنات مانخلص عسى مانزل باليت الا رحنا شرينا ههههههه

بنت خالتي نصحتني قالت لي ( الكحل ، قلم الكحل ،قلم الحواجب ، الفاونديشن ، كونسيلر ، الماسكرا ) اشياء بتخلص بسرعه ف كثري منها مايسوى تتعنين السوق على كحل ولا ماسكرا ...! ف بنقلكم نصيحتها الي انفعتني ..

نبدي باللسته :

- كحل اي لاينر

-كونسيلر

-فاونديشن

-بلشر

-هاي لايتر

-قلم او شدو حواجب 

- فرش اذا ناقصج

-باليت الوان اساسيه ( جوكلت بار او مورفي 35 مات المفضل عندي )

- قلتر ( عروس لازم لمعه هههههههه ) 

- شدوات بلمعه ( اربن ديكاي شدواتهم فضيعه )

- مثبت المكياج من اربن ديكاي

-فكس بلس

- رموش ( لو انتي تحطين )

بيوتي بلندر جديده + صابونتها ضروريه لان تنظفها من قلب

- حمر ومحددات (احب ماك درجاتهم متنوعه )

بالنهايه حبيت اقولكم لاتكثرون وتشترون بهبل فكرو بعقل واخذو قطع مميزه وخلو معاكم دايما نوت سجلو فيها النواقص وكل شي تحتاجونه .. ساعات الواحد من كثر التفكير بدووخ وينسى ..سوي الي تحتاجينه من ليزر وعنايه بنفسج لاينقص عليج انج عروس ولازم تسوين كل شي ..! شوفي بشرتج شنو تحتاج وسويه بس..ودايما وقت التجهيز خلي معاج شخص تثقين برايه وينبهج وتحسين صج يحبج ويبي لج الزين ..

الله يتمم عليج بالخير واستمتعي بهالايام ويوم عرسج لاتتوترين صج بيكون في توتر بس عادي توتر خفيف لاتفكرين فيه ويزيد ،، ويوم عرسج تريقي عدل عشان لاتدوخين .. وصوري بيوم عرسج سلفي واستانسي بعدين بتستانسين ع الصور ...

THE END