Color Pop Yay Or Nay - رفيو عن منتجات كلربوب

السلام عليكم حبيباتي :*

اليوم موضوعنا غير شوي :* بنطلع من جو القهو والتنظيم والسكن كير :*

بتكلم اليوم عن ماركة انشهرت وانشرت باخر فتره وعليها اقبال كبير ليما الحين ماراحت هبتها توقعت فتره وتروح هبتها .. بس لما جربتها الصراحه ادمنتها بشكل مو طبيعي وفرق مكياجي صار احلى واجمل

الماركه تنفع حق مدمني القلتر والي يحبون اللمعه بالميكب :*

موقع

ماركتنا اليوم ماركه امريكيه اسمها (كلر بوب) ماركه مالها اي محل ولا متوفر باي دبارتمن ستور = المحلات الكبيره ( دبنهامز – بلومنغديلز الــخ ) لها موقع الكتروني من خلاله تقدرون تطلبون منها بس وفي بعض التاجرات بالـ instagram  يبيعونها بس طبعا اكيد لهم نسبه ويزيدون على السعر الاصلي , انا عن نفسي اطلب اون لاين اضمن انه المنتج اصلي وما يستغلوني . لانهم يبيعونه دبل السعر وزياده عليه ادفع توصيل اغلى من المنتج نفسه ..! فـ اطلب كميه شدوات من الموقع وادفع شحن بالنهايه اكون انا الربحانه .. :*

الماركة تنقسم الى :

شدوات ميتاليك \لمعه – شدوات مات \ بلشرات – برونز \ هاي لايتر \حمر كريميه \ حمر سائله مات \حمر سائله ستن  \ منتجات حواجب \ جل لاينير \اقلام اي لاينر \محددات

بس الـ best seller  اهما : الاي شادو + الحمر الكريميه + الحمر المات

الحين بقولكم عن الاشياء الي جربتها :

الشدوات :

قوام الشدوات بجمنتت وتحسونها رطبه شوي عشان جذي يحرصون انه تتسكر العلبه عدل عشان لاتنشف وبسرعه تطلع معاكم ولونها قوي ماتحتاج مثبت قبلها

طريقة استخدامي لها عشان يطلع اللون ثابت وقوي طول المناسبه :

لازم احط برايمر على عيني كلها

ارش على فرشة شعرها بلاستيك فكس بلس واحطها بالشدو وبعدين اطبطب فيها على عيني وبعدين احط صبعي بالايشدو مره ثانيه واوزع على الجفن جذي اللون يكون معاي قوي وادمجه بصبعي او بفرشة دمج .

طلبت اكثر من لون بس ماحبيت اغامر بالوان ماراح استخدمها وماتنفعني بالمكياج .

ماتوقعتهم جذي كل لون احلى من الثاني :

الالوان الي عندي :

Friskie : هاللون يبجي من جماله تحطون سموكي بنيات بعدها توزعونه على الجفن المتحرك وتدمجون ايننن في لونه اسود على رمادي فيه لمعه

حطيته مره بمناسبه والكل يسالني منو حاطلج ميكب ههههههههه عبالهم ميكب ارتست بركاتك يا كلر بوب

عندي منه حبتين وحده يديده خاشتها للمستقبل

Bae : اللون بني محمر واللمعه الي فيه على ازرق عجييييييييييييييييييييييب ينحط بروحه مع اي لاينر ضعيف ورموش يطلع شي شي

Envy  : هاللون بنفسجي – بنفسجي نفس لون الماكنتوش – وايد حلوو ينحط على الجفن كله مع شدوات بنيه او الجفن السفلي بين الرموش يعطي شكل حلوووو .

Krinkle : لونه ازرق على رمادي ولمعته ذهبيه هاللون وايد حلو بالعلبه بس لحد الحين ماني عارف استخدمه بطريقه صح تطلع جماله .

So Quiche : هاللون بني برونزي بلمعه فضيه حلو بس ماحسيته حلو على عيني يعني يحتاج عدسات ملونه تطلع اللون بشكل اجمل ويكون بيرفكت .

Hamerd  : هاللون زيتي وفيه لمعه ذهبيه وايد حلوو وانييييق جدا ويلوق على الناس الي عيونهم بنيه فاتح يطلع لون العين احلى

3  : اللون بنفسجي على بني بلمعه فضيه غريب بس وايد حلو ع الجفن

 cricket : بني بلمعه فضيه غالبيه الالوان صعب اوصفها بس الشي الحلو الي بكلر بوب عندهم خلط بالالوان الغريبه    

I heart this :  هاللون عجيب صدفي على ذهبي ولقلتر الي فيه فضي ف عجيب يمشي مع اغلب ستايلات المكياج انا احطه عند مدمع العين او بنص الجفن او خط ضعيف تحت الاي لاينر يبرز جماله ، يعطي شكل انييييق

Filpper اللون بالعلبه برتقالي بلمعه ذهبيه غامرت وشريته توقعت بيكون برتقالي مركز بس طلع العكس لون حلو ونهائيا مو برتقالي على العين اللون يصير ذهبي يكسر على برتقالي خفيييف

Fringe هاللون حلو وعملي جدا صدفي بلمعه ذهبيه حلو على الجفن ويطلع الميكب بشكل انيق

Lovely هاللون اسم على مسمى مشمي فاتح على ذهبي ولمعه فضيه وايد حلو على العين لو تحطون منه نتفه على الميكب يعطي شكل غييير . من الالوان القريبه على قلبي

تقريبا الي عندي 12 لون اخترتهم بعنايه ماحبيت انقي الوان حلوه بس ما استفيد منها ..

الحمر الكريميه :

شريت وحده من محل بالكويت واللون عجبني لدرجه اني احطه بكل طلعه من شريته < هبيت فيه > الحلو بهاللون انه احطه بدون فاونديشن وشكلي يكون حلو مايحتاج فاونديشن :*

ضاع مني مع الاسف وحزنت عليه حزن :( > اي من صجي ماحب تضيع اغراضي < وبطلبيتي من الموقع طلبت منه 2 هههههههه من كثر ماني محتره عليه ويوم وصلت طلبيتي جان القاه !!! شفتو شلون الحظ ؟

ووزعت اللون على صديقتي :* 

قوام الحمره كريميه ثابته وقت معقول شكل الحمره جنه قلم ضعيفه وطويله ف تغني عن المحدد بالطلعات السريعه .

حبيتهم ك كوالتي والوان وسعر ممتاز  وريحتهم حلوه ..

الالوان الي عندي نبدي باول لون الي وقعت بغرامه :

لومير Lumere : لونه وردي لحمي مايل على بنفسجي عجيييب اعشق هالدرجه تناسبني 

شريت نفس الاسم المحدد وايد حلووو بس تقدون تستغنون عنه الحمره كافيه .

جريند GRIND:  لونه بنفسجي وسط لا فاتح ولا غامج مقارب جدا لـ هيروين من ماك ويعتبر بديل ارخص

ديزد DAZED : احمر مايل على وري مو الاحمر الصريح لا وايد حلوو هاللون حق الي مثلي مايحبون الاحمر الصريح والقوي < احيانا افضل احط اللون الاحمر لمناسبه بس ما اتحمل قوه الاحمر وامسحه <

سلك SLIK : عنابي غامج مايل على بنفسجي شي خفيف يعني مقارب لـ ريبيل من ماك وايد حلو اللون ولما اتوهق باي ميكب احطه يفي بالغرض .. هاللون له ذكرى حلوه حطيته بحفلة تخرجي من الجامعه واللون بالصور طلع عجيييب خصوصا اني معتمده عليه وعلى الرموش بهاللوك :*

الحمر المات :

اول طلبيه لي من كلر بوب طلبت سيت ميني فيه 5 حمر نزلوه كلر بوب ل الحمر المات الافضل مبيعا كان في سيتين بالوان مختلفه فوكسي \ كيتي  اخترت الي عجبني فوكسي ك تجربه لكوالتي الحمر المات خصوصا اني ماحبهم ف قلت بعطي الحمر المات فرصه 

جربتهم وعجبوني .

ثباتهم حلو ومعقول +الوانهم جميله +سعر حلوو

اخترت 4 الوان من الي بالسيت عجبوني في لون خامس

اللون الخامس  صاير احمر على برتقالي ماحب هالدرجه ماتناسبني كلش :

والمره الثانيه طلبت الفل سايز منهم  الدرجات الي خذيتهم :

كلوليس clueless : وردي على بنفسجي لونها فاتح تحتاج فاونديشن بس الدرجه جمييله

توللي Tulle : اللون بنفسجي مايل على بني بالعلبه لون غير صاير لحمي غامج بس علي لما حطيت بنفسجي \بني 

حلو بس يحتاج فاونديشن وتغطيه محترمه لان احسه يعطي الويه منظر تعبان اذا كانت التغطيه خفيفه .

بيبر Beeper : لونه لحمي اللون حلو ما يبهت الويه ولا يعطي لوك المريضه < خوش تسويق ههههه >

مو بيتر More Better : فوشي غامج مايل على احمر اللون يعقققققد من جماله ، يحتاج فاونديشن طبعا ، يضبيض الاسنان، وايد حلو حق مناسبات راقي .

الحمر المات حلوه ثباتها حلو بس بعد اكل وشرب لمده طويله تحتاج تزيدون عليها من النص يصير فراغ

ولنتيجه افضل قبلها تسوون سنفره لـ الشفايف و تحطون مرطب بشكل بسيط وبعدها توزعون الحمره

بهالطريقه اضمن لج ثبات اطول ونتيجه نهائيه حلوه .

،

بنهاية هالبوست شخصيا رايي بماركة كلر بوب وايد حلوه اذا حابه يكون عندج شي سعره زين وكوالتي ممتاز انصحج تاخذين منهم :* سواد حمر او ايشدو او اي شي حسب ذوقج

،

البوست الياي بيكون شلون تطلبون من كلر بوب ماحبيت احطهم ببوست واحد عشان لايكون زحمه ف قررت افصلهم :*

تمت ،

اتمنى عجبكم البوست واستفدتو منه :*