افكار ومقترحات لـ صيف ممتع - Summer gathering ideas

السلام عليكم حبيباتي :*

اليوم موضوعنا عن افكار ممكن تسونها بالصيف اذا ماعندكم ميزانية سفر او شاليه .. طبعا الافكار كلها تسونها مع اهلكم وصديقاتكم ماتنفع بروحكم لان حلاتها مع يمعة اهل :*

زهبي لج نوته وكوب قهوه ويلا نبدي :*

-

اول اقتراح - Movie Night 

انا شخصيا افضله ، ( الموفي نايت ) استمتع فيه وحلو حق يمعة بنات تستمتعون بالفلم مع بعض وبعدها عشا حلو وتقدرون مسابقات والعاب يصير الجو عجيب وونيس و فيه نشاطات :* 

اول شي نحتاج ورقه وقلم ونسجل فيها النقاط المهمه :

التاريخ واليوم

المكان

عدد الاشخاص

منيو العشا

سناك بار 

تصميم بطاقه الدعوه 

الافلام

الالعاب

جهاز عرض + لوحه بيضا

زينه ليتات

لوحه عليها اسم الفلم واسمي و ترحيب بالضيوف ( اخر البوست تلاقونها جاهزة لـ الطباعة )

-

بطاقة دعوه الكترونية :

في وايد بطاقات جاهزه بـ بنترست او بقوقل كل الي عليكم تكتبون عليها البيانات وترسلونها عن طريق الواتساب 

( نهايه البوست حطيت لكم تصاميم حق بطاقة دعوه )

منيو الاكل :

تحددون شنو بتقدمون حق ضيوفكم انا ترتيبي كـ الاتي والفكره كانت help your self

حطيت عربانه متحركه ( مالت الجاي عرفتوها ) ورتبت فيها السناك ( بوب كورن \ ناتشوز \ بطاط شبس وكاكاو وحلاو وعصاير وماي وكل شي) بحيث يكون سناك بار متحرك والكل يخدم نفسه.

العشا كان اختياري لشغلات يحبونها البنات ومحد يختلف عليها  :

 بنك باستا + بطاط فرايز + جكن بوب كورن + كولا + ماي 

-طريقة البنك باستا مالتي لذيييذه بشهادة كل الي جربوها-

وصفة البنك باستا -هُنا-

الحلو قدمت ميني بان كيك وتشكيله كاكاو مختلفه بالاضافه حطيت قهوه عربيه + جاي 

اقتراحات : بدال العشا تقدرون تحجزون ستشين برجر اذا عددكم كبير او تطلبون بيتزا اكثر من نوع .

هالاشياء كلهم كتبتهم بـ لسته ورحت الجمعيه هالشي اختصر علي وقت كبير بالتجهيزات :* 

مكان القعده : تحددون المكان الي تبونه وترتبونه وتنظفونه حلو ؟

نحتاج تلفزيون شاشته كبيره مع وصله hdmi عشان تشكبونها بالـ كمبيوتر وتعرضون الفلم

او شاشه عرض لـ بروجكتر مع بروجكتر .

اكسسورات المكان : شموع - ليتات زينه - ليتات ليزر 

بالاضافه الى تحطون مخدات وبلانكت ( عشان اي احد يحس بالبرد يتغطى )

سله تحطون فيها جميع انواع الشحن والبطاريات +جهاز Wifi 

الفلم  : انا حملت اكثر من فلم  من تونرنت وحطيت معاهم الترجمه ( قوقل مايقصر فيه اكثر من شرح ) 

كتبت اسماء الافلام باوراق صغار وسوينا قرعه .

الالعاب : مونبولي + جنجفه + اونو + ديل + جماد حيوان نبات + wii  + لعبه بدون كلام 

• في ابلكيشن اسمه جلسه بالاب ستور فيه العاب تونس  تنفع حق يمعات*

اهم شي  تدزون الدعوه قبل العزيمه بوقت كافي + قبل العزيمه بيوم او يومين تاكدون على المعازيم  وتحرصون عليهم يلبسون لبس عملي ومريح بدون تكلف .

فيديو الموفي نايت الي سويته قبل سنه كان بالشتا :*

،

Pool Party 

بما انه صيف و الجو حار فـ احلى شي ممكن يصير السباحه والتان فـ ليش لا ليش ماتسونها بالبيت وتستمتعون مع حبايبكم ..

شنو نحتاج ؟

تقريبا نفس خطوات الموفي نايت بس عليها تعديل ..

نحتاج مكان برايفت يكون فيه المسبح س،اء مسبح موجود او مسبح تركيب

ثانيا كورنر عليه طاوله بلاستيك (ليش بلاستيك عشان مايخربها الماي ) 

الاشياء ال نحطها على الطاولة :

تان

حمايه من الشمس

مجموعة فوط 

مشط + كلبسات شعر 

نظارات سباحه + طفاحيات

شامبو +بلسم+ سشوار 

سناك بار > مجموعه سناك ترتبونها  > لان مع السباحه الجوع يزيد 

ركن المشروبات > تحطون فيه علب بلاستك كبار تترسونها ثلج وتحطون كل انواع العصير والبيبسي وبطول ماي

،

اقتراح لـ خلطه عصير لذيذه > 6 عصير اناناس 6 عصير ليمون ملعقتين او ثلاث سكر + ملون طعام ازرق + شرايح ليمون يفضل تحطونها بمطارة زجاج متروسه ثلج :* لذسذه وتسرسح

تقدرون تقللون الكميه اهم شي علب العصير تكون متساويه .

منيو الغدا : تقدرون تطلبون من برا او BBQ  وتكملون سباحه بعدها :*

،

Pj party - بجاما بارتي

هالشي يفرق من بنت لي بنت انها تنام برا بيتها .. 

تقدرون تسسونها بدون ما احد ينام بس مجرد انكم تسوون جوو النوم وتلبسون بجامات مريحه وانيقه وتكون قعده مريحه.

نحتاج :

دعوه . 

مخدات + بلانكت + ماترس + شراشف > ترتبون الصاله بشكل حلو

اضاءه خافته وليتات زينه > تعطي جو عجيب

سلة الضروريات : شواحن + مناديل ميكب + ربطات شعر + لوشن + دلاقات (شرابات)

سناك & مشروبات بارده وساخنه 

ممكن تحطون لكم فلم او مسلسل او تلعبون ..

،

تقريبا اغلب الافكار متشابهة بالتجهيزات بس الفكره نفسها تختلف وفي اضافات معينة على كل فكره .

افكار اضافيه :

كورنر تصوير Photo booth + صور فوريه

مسابقة الذ طبق. < تفوز بجائزه>

اسئله واجوبه ومعلومات عامة

مسابقه الهديه المغلفه :

هديه تغلفونها باكثر من تغليف وتفر علي كل بنت وكل بنت تشق تغليف وتعطيه البنت الي بعدها واخر ،حده تفتح اخر تغليف الهديه تكون لها .< حلاتها مع موسيقى حماسيه>

خصصت ملف بحسابي ببنترست لـ مجموعه من الافكار ممكن انها تساعدكم 

حسابي بـ بنترست - هُنا- 

لتحميل بطاقات الدعوه   لـ الموفي نايت :

هُنا

حقوق الصور : من بنترست + قوقل .

،

تمت ،

اتمنى استفدتو من البوست وعجبكم :* تعليقاتكم تسعدني

،