طلب بلانر من موقع ارن كوندرن – Erin condren

السلام عليكم حبيباتي :*

اليوم موضوعنا وايد بنات طلبوه مني وشرحته جم مره بـ سناب جات بس للاسف سناب مو مرجع دام لاي شي لازم نوثقه بمكان ثابت .. ف انسب شي لهالموضوع البلوق لان فيه شرح طويل وصور وخطوات ..

الموضوع اهو ( كيفية طلب بلانر من موقع ارن كوندرن – erin condren ) .

بس بالبداية بعرفكم عن البلانر شوي ..

عباره عن منظم اسبوعي \شهري لـ حياتكم يساعدكم على تنظيم يومكم ومواعيدكم المهمه وتكتبون فيه كل شي وتنظمون حياتكم ويعتبر شي يساعدكم تلتزمون بروتين وحياة منظمة ، انا حاليا اضيع بدونه .

تقسيمة المنظم :

بداية كل شهر منظم شهري كامل ( الشهر كله يبين عندكم وتحددون المواعيد المهمة )

بعدها المنظم الاسبوعي ( كل اسبوع له صفحات محدده )

اخر شي في اوراق فاضيه لـ كتابه الافكار السريعه

فيه نوته اضافيه تقدرون تشيلونها وتكون بالجنطه مثلا

نهاية المنظم في جيب بلاستك لحفظ الفواصل والـ ستكرز

كل شهر له لون معين واقتباس معين يكون ببداية الشهر

الموقع يوفر لكم اكسسوارت جق البلانر ( غلاف بلانر -جيوب اضافية – ستكرز – اقلام – فواصل – الــخ )

* *تقدرون تغيرون الغلاف اكثر من مره ينباع منفصل - مميزات بشرحها بعدين **

حلو .. فاهمين لحد الحين ؟؟ يلا سوي لج كوفي او اي شي بارد تشربينه لان الموضوع يحتاج تكونين رايقه .. :*

...

يلا نبدي بطريقة الطلب بس قبلها في اشياء معينة لازم تكون عندكم :

عنوان امريكي من اي شركة شحن (ارامكس \My Us \بوستا بلس \الــخ ) تختارونها حسب الي يناسبكم وتقدرون تسوون البيانات كلها بالنت او تروحون مكتب شركة الشحن .

فيديو - شرح شركة رامكس –شوب اند شيب

شركات الشحن توفر لكم عنواين باكثر من دولة كل الي عليكم تاخذون العنوان وتنسخونه بالخانات المطلوبة بالباداية تحسونه صعب بس مجرد ما تسون الخطوات اكثر من مره تتعودون عليه وتاخذ ايدكم على الموضوع

فيديو - شرح تعبئة البيانات في مواقع التسوق

فيزا الكترونيه ** تعبئة** عباره عن فيزا خاصه بالتسوق اون لين تحولون لها مبلغ من حسابكم وتتسوقون فيه

ايميل ثابت وتستخدمونه دايماً « لتسجيل بالمواقع »

حساب باي بال: باي بال هو موقع ويب تجاري يسمح للمستخدم بتحويل المال عبر الإنترنت والبريد الإلكتروني لعناوين مختلفة. كما يمكن للمستخدم إرسال المال المرسل إليه إلى الآخرين أو تحويله لحساب في المصرف. ويكيبيديا

تسونه من خلال موقع الباي بال وتربطونه بـ بيانات الفيزا

شرح لـ عمل حساب باي بال

او من خلال موقع البنك

( بنك الكويت الوطني يوفر هالخدمة بدون اي تعب ) تبطلون الاون لاين وطني وبعدها تروحون قسم الخدمات الشخصية مثل هالصوره :

الباي بال في ناحية امان كبيره ف اي موقع تسوق اون لاين تلقون من خلال وسائل الدفع باي بال اختاروها على طول ..لان في مرات يوصلون الشحنه غلط او يضيعونها فـ تقدرون تتواصلون مع شركة الباي بال بالاضافة الى في مواقع ماتقبل فيزا كويتيه او سعوديه وما يضبط الطلب وينرفض لكن اذا دفعتوا عن طريق الباي بال مرات وغالبا تضبط .

خلصنا اول خطوة والباقي سهل ان شاء الله .

...

موقع البلانر :

Erin Condren

واجهة الموقع الرئيسة