نصايح لـ طالبات الجامعه - ميم بوست

نصايح لـ طالبات الجامعه :* 

اهلا اهلا بالمستجدات و المستمرات بعد :*  

موضوعنا اليوم عن الحياة الجامعيه ،شلون ننظمها بحيث انه نوازن ما بين الدراسه وحياتنا اليوميه وطلعاتنا … خلكم مركزين معاي هالنصايح خلاصه5 سنوات بالجامعة  اسال الله ان يوفقكم كلكم ويسهل عليكم مشوار الدراسه … زهبي لج كوب قهوه واستمتعي بالبوست ..

،

ترتيب التدوينه بيكون كالآتي :

• شنو نحتاج ؟ القرطاسيه \ الملابس \ الكترونيات
• تنظيم الوقت
• مكان الدراسة
• نصايح عامه

* فيديوات باليوتيوب تساعدكم

،

شنو نحتاج ؟

** القرطاسية ** :

خلاص ودعنا دفاتر الثانويه والستكرز والتسطير ..هههههه انا لي الجامعه اسطر اعترف احب النوت يفتح نفسي فــ عادي لو تحبين هالشي كملي فيه .. اللسته الي تحته اغلب الي فيها احتجته يكون معاي ماشيلهم كلهم المهم بس وباقي الاغراض بـ اللوكر .

** مو شرط تشترين كل شي جديد اذا عندج اشياء زينه من ايام  الثانويه استفيدي منهم ولا تقطينهم **

• نوت كبير حق اكثر من مادة تقسمونه بفواصل كل ماده بروح .
• مقلمه
• فواصل فسفوريه 
• هاي لايت فسفوري
• قلم بو اربع الوان اكثر من حبه > كله يضيع ههههه
• اقلام رصاص + مساحه + برايه > حق الامتحانات بعض الدكاتره لازم قلم رصاص
• ستكي نوت الملونين 
• صمغ + مقص صغار
• دباسه صغيرونه + دبابيس
• ملف حلقات معدنيه + حافظ اوراق النايلون > يفيدكم تخرمون الاوراق وتحطونهم بملف واحد
• ملف عادي خفيف حق الهوم وورك او المراجعات

** الملابس ** :

هالنقطه راح تختلف من بنت لبنت وهالشي يرجع لذوقها الشخصي ..

اكيد اول سنه بتستانسون وتلبسون وتكشخون من بعد مريول المدرسه ههه بس لاتخلون هذا الشي اهم شي !! اول شي راح تطير اعانتكم ع اللبس وراح يكون شغلج الشاغل شلبس وشحط .. مع انه بالجامعه محد له شغل باحد الا الفئه الي همهم المظهر وخز الرايح والراد مالكم شغل فيهم .. 

عليج من نفسج والشي الي يريحج اهم شي شكلج حلو ومرتب ومحتشم 

كان ستايلي بالجامعه كاجوال ومريح اهم شي انا مرتاحه فيه ولما اتحرك من مبنى لمبنى ما اتضايق ..ومرات البس عبايه واغير عبي ملونه او سوده قصات العبي جدا مريحه وبراااد .

اهم اهم شي الجوتي !! حيل الجوتي اذا مو مريح ياثر على الظهر وتحسون بالم .. اخر جم سنة قمت البس جوتي رياضه حييييييل ارتحت 

نايك + سكتشرز مريحييين .. بعدو عن الفلات والصنادل والكعب .. اذا بخاطركم كعب لبسو الطبي او المتساوي بس نهائيا ما انصح متعب ..

** الجنطه **

اخذو حجم مناسب مو صغيره ماتشيل شي ولا كبيره مالت سفر

> جناط اتش اند ام الكوالتي حلوو وعمليه ..

اذا كنت بلبس جنطه صغيره او كروس اخذ معاي جنطه هارودز الجلد

((احط فيهم اغراضي وكتبي وبوقت البريك اقطها باللوكر وامشي خفيفه )) حيل مريحين وتكد معاكم .

• * الالكترونيات* :

• كمبيوتر يتحمل الشغل والضغط .. 

نصيحتي اخذي لج ماك بوك برو يتحمل وقوي ..

برامج المايكروسوفت تنزل عليه عادي .. غالبا بداية السنه الدراسية يسون خصومات على اجهزه ابل صج غالي بس حلال كل فلس فيه ..

فلاش ميموري > راح تحاجينها وايد .. اشتري لج اكثر من حبه san disk  ممتازه .

هارد دسك> : عشان تحفظون كل ملفاتكم عليه .. والجهاز يكون فاضي عشان لايعلق ..

بطاريه شحن اضافيه > new trent  ممتازه من خلال تجربتي

واير شحن  + بلاك اضافي > تحطينه  باللوكر حق الازمات . بعض الكليات يوفورون اماكن شحن .. بس انا افضل يكون عندي عشان اخذه اي مكان بالكلاس او بالمكتبه اشحنه ..

{تنظيم الوقت} :

شلون يكون يومج منظم ويصير لج روتين ؟

• خلي عندج بلانر > وكتبي فيها كل شي بتسوينه قبل النوم وخليها يم راسج ولما تقومين حطيها بجنطتج واثناء الدوام اي شي يخطر على بالج كتبيه عشان لاتنسين . بهالطريقه راح تعودين نفسج على روتين
•  من وين اخذ بلانر ؟ 

كل مكان تحصلونه والحين ثقافة التنظيم والبلانرز انتشرت عندنا بشكل كبير وصار في وعي من ناحية اهمية التنظيم .

اقتراحاتي لكم : 

البلانر الي عندي من ايرن كوندرن erin condren ( طريقة الطلب )

 - boxigo مشروع بنت كويتيه ..

(( الصور الي بالبوست كله من شغلها :* ماشاءالله ))

شغلها وايد  مرتب وانيق واهتمامها بالتفاصيل جدا يعجبني .. ،تختار كوالتي المنتجات بعنايه وهالشي شفته لما اهدتني بلانر كن متوهجا  :*

كل مكان تحصلون فيه مو شرط براند معروف اهم شي يعجبج تنظيمه من داخل .

..

تنظيم الوقت :

• حاولي تخلصين شغلج كله بالجامعه  من هوم وورك واسايمنت وغيره لو كان عندج وقت كافي وبريك طويل استغلي الوقت وخلصي وافتكي .. روحي المكتبه ودرسي ونظمي امورج لانه مكان هادي ومريح .

• سوي لج جدول تطبعينه وتخلينه داخل البلانر ونسخه على مكتبج بالبيت .

محتوى الجدول كـ الاتي :

عدد الامتحانات 

عدد المشاريع المطلوبه

عدد الكويزات

الفصول الي داخله بكل امتحان

تواريخ الامتحانات

+

جدول يحدد اوقات الكلاسات والبريك او طبعو جدولكم الجامعي من السستم .

غالبا الدكاتره يوزعون السلبس / بالعربي الخطه العامه لـ الماده ..

وفي دكاتره ينقلونه لكم شفوي فـ حلو تكونين مرتبه نفسج 

{ المكتب الدراسي} :

 لازم يكون عندج  مكان مرتب ومهيأ لـ الدراسه .

طريقة ترتيب المكتب :

لازم يكون واضح وفيه عندكم مكان حق الاوراق والهوم وورك منظم لـ الملفات + مكان لـ الطابعه 

هالصوره توضح شنو اقصد

picture from Pinterest

جيكو ع الاسهم الثلاثه هالشغلات راح تنفعكم حيل للاسف ما اكتشفتها الا باخر سنه بالجامعه 😂

الي تقسم الملفات والاوراق جداً مفيده .. شلون ؟

لما تردون من المدرسه / الجامعه تفضون كل الاغراض الي بالجنطه او الفايل وتطلعون كل ورقه محذوفه وتحطونهم فيها ( سبحان الله يمكن كاتبين عليها ملاحظه مهمه او تكون ورقة طبيه وتحتاجونها ! او جدول ) .

{{ انا علمت الخدامه لما تنظف غرفتي اي ورقه طايحه تحطها هني ماتقطها بـ الزباله }} وصج انفعتني هالحركه . .

الشغله الثانيه : خذيت الملف الي من داخل تقدرون تحطون فيه اوراق بس تكون مخرمه ~ قمت احط فيه امتحاناتي او الكويزات لما يعطونا اخشهم عشان ارجع لهم بعدين / الاعذار الطبيه اسوي منها نسخه ثانيه واسلم الاصليه

لـ المدرسه \ الدكتور لازم لازم يكون عندكم باك اب ساعات المدرسين او الدكاتره يضيعون الاوراق ويحسبون يوم غياب عليكم مع ان عندكم عذر وجذي تنقصون درجات 😁

السهم الثالث على الي ترتب الاوراق ع المكتب وهالحركه تنفع اذا سويتو هوم وورك وخلصتوه وتحطونه فيها على ماتخلصون كل شي وتحطونها بالفايل / او لما تطبعون كل سلايدات الماده وتخلونهم لين ما تدبسونهم مع بعض 😁 

نصايح عامة :

• خلو معاكم نوته وسجلو بيانات الدكاتره واي ملاحظه يقولونها .

• في ساعات معينه يحددها الدكتور اسمها الساعات المكتبيه اذا كان عندكم اي سوال او استفسار تروحون لهم بهالوقت .

• اذا طلب الدكتور منكم بحث او برزنتيشن وعطاكم الحريه تشتغلون بروحكم فـ هذا افضل لانكم راح تتعبون على شغلكم وترتبونه حسب ما تبون .
• اما اذا حدد قروبات فـ قسمو الشغل بينكم بالتساوي عشان محد ينظلم بالشغل .. ووثقو شغلكم + خلو لكم يوم يكون اجتماع حق قروب الشغل بمكان معين ووقت يناسب الكل .. والي ماتحضر كيفها اهي الي بتخسر درجتها.. واذا الدكتور يتابع معاكم الشغل بلغوه انه زميلتكم ما حضرت ولا سوت عشان ماتنظلمون بالدرجه . وما تتساوى معاكم بالدرجه وانتو تعبتو بالشغل .
• غالبا بالجامعه بيمرون عليكم بنات يصيرون كلووووز وتسولف وتاخذ رقمج وتسال عن كل شي يخص الماده وبس يخلص  الكورس عادي جدا تصكج بلوك وتمر يمج ما تسلم حتى ههههه ف بردو اعصابكم + خلكم رسميين وعلاقاتكم سطحيه .
• لاتعطين اي احد شغلج ونوتج يصورونه تقولج ( اخذه اصوره وارده باجر ) لا لا لا عادي تضيعه وتقول ماعطيتيني والله في بنات من هالنوع استغفرالله لا ذمه ولا ضمير اهم شي تاخذ الي تبيه ومصلحتها ردج يكون ( ميخالف خنروح الكوبي سنتر ويصورلج نسخه واخذيها - احتاج نوتي ) وبس تبي اهلا وسهلا ما تبي براحتها .
• في دكاتره يعطون ورقه الكشف وتحطون علامه وتحضرون نفسكم في بنات يحضرون بنات مو موجودين ( لا ) تفكرين تسوينها حتى لو صديقتج .. احتمال الدكتور يسوي لج سالفه وياما بنات انحرمو من الماده والسبه هالموضوع فـ دربالج .

• خلي علاقتج سطحيه مع البنات بالجامعه لاتعطين تفاصيل حياتج كلها ..
• البنت سمعه ،، سمعتج بالجامعه اهم شي خلج البنت السنعه الي يمدحون اخلاقها وادبها لاتصيرين البنت الي بس تضحك وتكركر على غير سنع .. كل شي باعتدال ياحلوين :*
• بعض الدكاتره يطلبون منكم حضور ندوات او وورش عليها درجات زياده .. روحو لاتخلون شي يطوفكم درجه درجتين تنفعكم بنهاية الكورس 
• غياباتكم خلوها نص الكورس او على نهايتها لاتخلصونهم ،، ينفعون بعدين
• دايما خلو غيابكم بعذر مو بدون بعض الدكاتره مايقبلون بدون عذر .

• صورو حياتكم بالجماعه وخشو الصور لـ الذكرى لما تتخرجون راح تحنون لايامها ،، اعلى ايام عمري بالجامعه استمتعت فيها وعرفت صديقات ودكاتره ذهب :) الحمدلله ..

،

** مصطلحات جامعيه ** :

كلاس = فصل دراسي

سستم = نظام الجامعه لتسجيل المواد

سلبس = الخطه العامه للماده يوزعها الدكتور

اسايمنت = الواجب او العمل الي يطلبه منج الدكتور

الكلاس اوف = المحاضره تم الغائها

برزنتيشن = عرض تقديمي 

الساعات المكتبيه = الوقت الي يتواجد فيه الدكتور بالمكتب للاستفسارات

ميد تيرم = امتحان منتصف الفصل

كويز = امتحان قصير

فاينل = امتحان نهاية الكورس

قريدات = الدرجات

بونص = درجات اضافية

المعيده = استاذه تساعد الدكتور عندها شهاده ماجستير 

بهالرابط حطيت لكم قائمة فيديوات ممكن تفيدكم :*

قائمة الفيديوات 

شكر خاص : شكرا لج عزيزتي روان لسماحج لي باستخدام صور منتجات boxigo :* الله يوفقج يارب

تمت ،